Home စာစုလေးများ အမေး “နီကိုရဲ” အဖြေ “လေးဖြူ”

အမေး “နီကိုရဲ” အဖြေ “လေးဖြူ”

1222
0

နီကိုရဲ – ကိုလေးဖြူရေ ဒီအစီအစဉ်ဟာ ပေါ့ပေါ့ပါးပါးအစီအစဉ်ပါ ဆိုတာကိုတော့ ပထမဆုံး သတိပေးပါတယ်ဗျာ။ သီချင်းဆိုတာက လူငယ်တစ်ယောက်ရဲ့ ခံစားမှုအပိုင်းမှာ တော်တော်လေးလွှမ်းမိုးမှုရှိတဲ့ အနုပညာပစ္စည်းတစ်ခုပါလို့ ကျွန်တော်သိပါတယ်။ ကျွန်တော်တို့ ငယ်ငယ်တုန်းက ကျွန်တော်တို့ကို လွှမ်းမိုးခဲ့တဲ့ အဆိုတော်တွေက ကိုစိုင်းထီးဆိုင်၊ ကံ့ကော်တောမျိုးအောင်၊ စိန်လွင်၊ ပလေးဘွိုင်သန်းနိုင်၊ ခွန်သန်းထွန်း၊ ခိုင်ထူး၊ ကိုတိုးကြီးတို့ပေါ့ဗျာ။ ကျွန်တော့်ခံစားမှုထဲမှာ ကျွန်တော့်ချစ်သူဟာ သူတို့သီချင်းတွေထဲကလို လှတယ်။ ကျွန်တော်ကလည်း သူ့ကို အဲဒီသီချင်းတွေထဲကလို သစ္စာရှိရှိခွင့်လွှတ်ပြီး အဲဒီသီချင်းတွေထဲကလို ပေါက်ကွဲခဲ့ရတယ်။ ကိုလေးဖြူရော ငယ်စဉ်ကာလတုန်းက ဘယ်သီချင်းတွေနဲ့ချစ်ပြီး ဘယ်သီချင်းတွေနဲ့ ခွင့်လွှတ်ခဲ့၊ ပေါက်ကွဲခဲ့၊ လွမ်းမောခဲ့ရဖူးသလဲဆိုတာလေးများ သိခွင့်လေးပေးပါဗျာ။

လေးဖြူ-ကိုရဲတို့လိုပါပဲ။ သီချင်းမျိုးစုံကို အကြောင်းပြချက်အမျိုးမျိုးနဲ့ ခံစားပြီး ကြိုက်ခဲ့ပါတယ်။

နီကိုရဲ – ရယ်စရာပြောတာတော့ မဟုတ်ပါဘူးဗျာ။ စိတ်လက်ချမ်းသာခွင့်လေး ခဏရတဲ့အချိန်မှာ အဆိုတော်တွေ သီချင်းညည်းမိရင် ကိုယ့်သီချင်းကိုယ် မညည်းမိကြဘူးတဲ့။ ဘယ်သူ့သီချင်းတွေကို အများဆုံးညည်းဖြစ်လဲမသိဘူးနော်။ အဲဒီကိစ္စကို ကျွန်တော် တော်တော်ကလေးကို အလေးအနက်ထားပြီး သိချင်ပါတယ်။

လေးဖြူ – အဲဒါဘယ်သူပြောတာလဲ။ အလွန်မှန်ပါတယ်။ လောလောဆယ်နားထောင်ဖြစ်တဲ့ အခွေတွေထဲကပဲ ဖြစ်တတ်ပါတယ်။

နီကိုရဲ – ကိုလေးဖြူ ပထမဦးဆုံး စင်ပေါ်တက်ပြီးသီချင်းဆိုတော့ သီချင်းဆုံးလို့ ပရိသတ်က တစ်ခဲနက်ကြီးကို အားပေးလိုက်တဲ့အခါမှာ ကိုလေးဖြူ ကိုယ့်ကိုကိုယ် စိတ်ထဲကဘယ်လိုပြောလိုက်မိသလဲ။

လေးဖြူ – ကျွန်တော်သေသေချာချာ မှတ်မိတာက ဘယ်သူမှ လက်ခုပ်မတီးဘူးဗျ။ သူများမင်္ဂလာဆောင်ပွဲမို့လို့။

နီကိုရဲ – ပြီးတော့ ကိုလေးဖြူ စတိတ်စင်ပေါ်ကိုတက်တဲ့ Style က နည်းနည်းထူးခြားပါတယ်။ အဲဒီ Style ရဲ့ အဓိပ္ပာယ်က ငါဟာ ပရိသတ်ကို ဆွဲဆောင်နိုင်တယ်ဆိုတဲ့ ယုံကြည်မှုကလာတဲ့ Style လား ဒါမှမဟုတ် သူတို့ငါ့ကို မျှော်နေကြတော့မှာပဲဆိုတဲ့ စိတ်ကလာတဲ့ အရိုးခံ Style နဲ့လား။

လေးဖြု – အဲဒီလိုစိတ်တွေ မရှိပါဘူးဗျာ။ သီချင်းဆိုရတော့မှာမို့ ပျော်တဲ့စိတ်ပဲရှိတာပါ။

နီကိုရဲ – ပထမဦးဆုံးပိုင်ဆိုင်ခွင့်ရတဲ့ ဂီတာလေးတစ်လက်နဲ့ ပတ်သက်ပြီး ဘယ်လိုခံစားဖူးပါသလဲ။ ကျွန်တော့်တုန်းကတော့ ဂီတာကို တစ်ညလုံးထထစမ်းနေမိလို့ ကိုလေးဖြူကို မေးကြည့်တာပါ။

လေးဖြူ – ကိုယ်ပိုင်ဂီတာတစ်လုံးရတဲ့အချိန်က ပျော်တော့ပျော်ပါတယ်။ ကိုယ့်ဟာကိုယ် ဂီတာကော့ဒ်နှစ်ခုလောက် သေသေချာချာ စတီးတတ်တဲ့အချိန်က ပိုပျော်စရာကောင်းပါတယ်။

နီကိုရဲ – ကိုလေးဖြူ အခုရနေတဲအောင်မြင်မှုက ကိုလေးဖြူကို အသက်ရှူကျပ်အောင် လုပ်တတ်တဲ့ အချိန်မျိုးရှိလား။ သူက ဘယ်လို အချိန်မျိုးမှာ ဘယ်လိုအကြောင်းအရာမျိုးနဲ့ ကိုလေးဖြူကို အသက်ရှူကျပ်အောင် လုပ်တတ်ပါသလဲ။

လေးဖြူ – အဆိုတော်တစ်ယောက်လို ကျကျနနကြီး ဆက်ဆံခံရတဲ့ အချိန်ဆို အသက်ရှူကျပ်ပါတယ်။

နီကိုရဲ – ကိုလေးဖြူ ကိုယ့်ကိုကိုယ် အိပ်မက်မက်တဲ့အခါ အောင်မြင်တဲ့အဆိုတော်တစ်ယောက်အနေနဲ့ မက်လေ့ရှိလား။ အိပ်မက်ထဲမှာ ကိုလေးဖြူက ဘာလဲဆိုတာ သိချင်တယ်ဗျို့။

လေးဖြူ – ကျွန်တော်အိပ်ရင် တုံးကနဲ အိပ်မက်မမက်ဘဲ အိပ်တာများတယ်။ မက်ရင်လည်း ကျွန်တော်ပါတာ မရှိသလောက်ပဲ။ နိုးရင်လည်း ဘာမက်သွားလည်း မမှတ်မိတတ်ဘူးဗျ။

နီကိုရဲ – ကိုလေးဖြူ စတိတ်ပေါ်တက်တဲ့အခါ အဝတ်အစားကို အဓိကအာရုံမထားဘဲ လွတ်လွတ်လပ်လပ်ပုံစံမျိုးပဲ ရွေးလေ့ရှိတယ်လို့ ကျွန်တော်ထင်တယ်။ အဲဒီ Style ကို သဘောကျမိတယ်။ ကိုလေးဖြူမှာ အဝတ်အစားရွေးချယ်တဲ့ လျို့ဝှက်ချက်ရှိရင် သိချင်ပါတယ်။

လေးဖြူ – လာကြည့်တဲ့လူတွေကို မလေးစားရာရောက်တဲ့ အဝတ်အစားမျိုးတွေကလွဲရင် ရှိတာနဲ့ အဆင်ပြေအောင်ဝတ်တာပါပဲ။

နီကိုရဲ – CNC အင်္ကျီကြော်ငြာတစ်ခုမှာ ကိုလေးဖြူရဲ့ပုံကိုကြည့်ပြီး ကျွန်တော့်မိတ်ဆွေ ကောင်မလေးတစ်ယောက်က ကိုလေးဖြူရဲ့ပုံစံက ရှက်နေတာလို့ ရယ်ရယ်မောမောနဲ့ မှတ်ချက်ပေးတယ်။ ကျွန်တော်ကတော့ ကိုလေးဖြူက ငါဘယ်လိုအိုက်တင်လုပ်ရမလဲလို့ စဉ်းစားနေတုန်းမှာ ဓာတ်ပုံဆရာက ရိုက်တာကို ခံလိုက်ရတာလို့ ပြန်ဖြေချေပတယ်။ အဲဒီပုံက သူရော၊ ကျွန်တော်ရော တော်တော်လေးသဘောကျတဲ့ပုံလေးဖြစ်နေတော့ ဘယ်သူကမှ အလျော့မပေးကြဘူး။ အဲဒီမိတ်ဆွေကောင်မလေးက နင်က ကိုလေးဖြူနဲ့တွေ့နိုင်တယ် တွေ့ရင်မေးပေါ့လို့ပြောတယ်။ အခု မေးပြီဗျာ။ ပရိသတ်အတွက်ရော ကျွန်တော်တို့နှစ်ယောက်အတွက်ရော ကိုလေးဖြူ ဓာတ်ပုံအရိုက်ခံရတိုင်း စိတ်ထဲမှာ ဘယ်လိုခံစားရလေ့ရှိလဲဆိုတာ သိချင်ပါတယ်။

လေးဖြူ – ခင်ဗျားတို့နှစ်ယောက်စလုံး မှန်ပါတယ်။ ပြီးတော့ ဓာတ်ပုံအရိုက်ခံရတိုင်း ဓာတ်ပုံဆရာကို သူလိုချင်တဲ့အတိုင်း ရပါ့မလားလို့ အီလည်လည်နဲ့ အားနာနေပါတယ်။

နီကိုရဲ – သူငယ်ချင်းတွေနဲ့တွေ့လို့ ရိုးရိုးလေးဖြူလို နေတာနဲ့ ပရိသတ်နဲ့ အလုပ်နဲ့ပတ်သက်ပြီး အောင်မြင်တဲ့အဆိုတော်တစ်ယောက်အနေနဲ့ တွေ့လို့နေတာ၊ နှစ်ခုအကြားမှာ Style ကွာခြားမှုက ဘယ်လိုရှိလဲ။

လေးဖြူ-ဒါကတော့ဗျာ။ အချင်းချင်းကျတော့ ပိုရင်းနှီးတာပေါ့။

နီကိုရဲ-အရမ်းပျော်ရင် ဘာလုပ်လေ့ရှိသလဲ။ အရမ်းစိတ်ညစ်ရင်ရော။ အဲ့ဒီနှစ်မျိုးအပေါ်မှာ ကိုလေးဖြူစိတ်ထားတဲ့ style ကို သိချင်ပါတယ်။

လေးဖြူ – ပျော်တုန်းကတော့ အော်အော်ပြီး ရယ်တာပေါ့ဗျာ။ ညစ်တဲ့အခါကျတော့လည်း အချိန်တန်ရင်တော့ ပီးသွားတာပဲလို့ ကိုယ့်စိတ်ကိုယ် ဖြေရတာပေါ့။

နီကိုရဲ – ကိုလေးဖြူရဲ့ သီချင်းအခွေသစ်က တော်တော်ကြာနေပြီဆိုတော့ စောင့်နေရတဲ့ ပရိသတ်တွေက သူတို့ကိုယ်သူတို့ မပျင်းရအောင် လှည့်စားချက်ကလေးတွေ ကောလာဟလကလေးတွေထုတ်ပြီး စောင့်ကြပါတယ်။ ကိုလေးဖြူက သူတို့အတွက် တော်တော်ကြီးကို ထူးခြားတဲ့သီချင်းတစ်ပုဒ်ကို စီစဉ်နေလို့ကြာနေတာတဲ့။ အဲဒီ စကားက ဟုတ်ပါသလား။

လေးဖြူ – မဟုတ်ပါဘူးဗျာ။ တစ်ခွေနဲ့တစ်ခွေ ပိုပိုကြာလာရတာက အခွေလုပ်ရတာ ခက်ခက်လာလို့ပါ။

နီကိုရဲ – အခုထွက်မယ့် အခွေသစ်ထဲမှာ ဘယ်လိုချစ်စရာကောင်းတဲ့ သီချင်းလေးတွေကို ပရိသတ်အတွက် ထည့်ဆိုထားသေးလဲ။ ထူးခြားတဲ့သီချင်း Style တွေရောပါသေးလား။

လေးဖြူ – ကျွန်တော်တတ်နိုင်သလောက် အစွမ်းကုန်လုပ်ထားပါတယ်။

နီကိုရဲ – ကိုလေးဖြူရဲ့ Album တွေမှာ ဓာတ်ပုံလှလှရိုက်ထည့်ပေးပါဆိုတဲ့ ပရိသတ်တွေကို ကိုလေးဖြူက လေအေးအေးကလေးနဲ့ သူတို့ကို တစ်ခုခု နားလည်သွားအောင် ဘယ်လိုရှင်းပြချင်ပါသလဲ။

လေးဖြူ – အခွေထဲက သီချင်းတွေနဲ့လိုက်ဖက်တဲ့ Album Cover ဖြစ်ချင်လို့ပါ။

နီကိုရဲ – ကိုလေးဖြူ အကြိုက်ဆုံးသီချင်းတစ်ပုဒ်ကို အခုထွက်တော့မယ့် Album ထဲကနေ ရွေးပေးပါလား။ Album လက်ထဲရတာနဲ့ ကျွန်တော်တို့တန်းပြီး ရဲရဲကြီးဖွင့်ပစ်လိုက်ရအောင်ပါ။

လေးဖြူ – ရဲရဲကြီးဖွင့်ပစ်လိုက်ပါ ကိုရဲရာ။ ကျွန်တော်ကြိုက်တဲ့ သီချင်းတွေချည်းပဲ စုထည့်ထားတာ။

နီကိုရဲ – Album အသစ်တစ်ချပ်မှာ ပထမဦးဆုံး စစဖွင့်တဲ့အပုဒ်ဟာ အရေးကြီးဆုံးလား၊ နောက်ဆုံးအပုဒ်က သေချာဖို့လိုတာလား။ ကိုလေးဖြူကရော အခုထွက်တော့မယ့် Album အသစ်ထဲက ပထမဦးဆုံးသီချင်းကို ဘာဖြစ်လို့ ပထမဦးဆုံးနေရာမှာ ထားရွေးဖြစ်တာလဲ ဆိုတာလေးလည်း ဖြေပေးပါ ကိုလေးဖြူရာ။

လေးဖြူ- Album အသစ်တစ်ချပ်မှာ အစကနေအဆုံးထိ အရေးကြီးပါတယ်။ အခုထိတော့ ဘယ်အပုဒ်ကို ပထမဆုံးထားရမလဲလို့ မရွေးရသေးပါဘူး။

နီကိုရဲ – ကိုလေးဖြူ အချစ်သီချင်းဆိုတဲ့အခါ သုံးစွဲတဲ့စကားလုံးတွေ၊ ရွေးချယ်တဲ့သံစဉ်တွေနဲ့ ဆိုဟန်တွေက ဒီခေတ်လူငယ်တွေကို ရင့်ရင့်ကျက်ျက်နဲ့ ချစ်စေချင်တဲ့ Style မျိုးရှိတယ်လို့ ကျွန်တော်ထင်တယ်။ အဲဒါ ကိုလေးဖြူက တမင်ရွေးချယ်ပြီး ရည်ရွယ်ချက်ရှိရှိနဲ့ ဆိုတာလားဆိုတာ သိချင်ပါတယ်။

လေးဖြူ – အဲဒီလောက်ကြီးလဲ မဖြေချင်ဘူး။

Rock metal အကြောင်းစုံ

LEAVE A REPLY

Please enter your comment!
Please enter your name here